唐文龍

《溏心3》賤男爆紅 唐文龍被老中青狂圍

唐文龍在《溏心風暴3》演賤男教授,同陳敏之有連場出軌情慾戲,雖然角色賤爆,但卻被觀眾Like爆,成為劇中最受歡迎人物!唐文龍入行捱足22年,終初嘗爆紅滋味,早前佢出席活動後一個人去銅鑼灣行街,行到邊都畀人圍,男女老幼都爭相合照,猶如天王出巡一樣!

唐文龍《溏心3》爆紅

台慶劇《溏心風暴3》就快大結局,不過自播出以來口碑一般,唯獨唐文龍同陳敏之呢一對夠晒話題性!兩人在《溏心3》中有多場火辣床戰,火速在Facebook洗版,闊別無綫11年的唐文龍隨即成為風雲人物!



唐文龍被老中青圍住影

唐文龍的爆紅程度絕對唔講得笑,早前佢出席活動後去銅鑼灣行街,僅停留幾分鐘已經引起人潮,個個爭住埋去同佢影相。群情愈來愈洶湧,唐文龍好快就畀廿幾三十人圍住,唔講仲以為佢做緊活動!可見唐文龍演的型佬教授阿Nic角色,真係深得民心!

最難得係,呢個賤狼角色,仍無損唐文龍正氣形象,當日唔止靚女,就連媽咪級,婆婆嬸嬸都爭住要影埋一份!

 


靚女sales姐姐都爭住同唐文龍合照,見到唐文龍親切搭住對方頭貼頭,冧死人!

一位媽咪級粉絲見到唐文龍非常興奮,單手抱住小朋友都要集郵,睇佢笑得幾燦爛!

女要影,男又影,唐文龍唔會嫌煩,逐一滿足大家。

連小朋友都被佢吸引,呢位小妹妹個開心樣,就知佢幾Like呢位型男!

唐文龍慈父上身

不單抱住小朋友的媽媽要集郵,呢位爸爸更加將女兒交俾唐文龍抱住合照,唐文龍即刻慈父上身咁,笑得幾甜!


貼地掃街醫肚

唐文龍爆紅後仍相當貼地,當日就篤魚蛋食燒賣醫肚。食完嘢飲杯蔗汁,士多老闆娘又爭住集郵,人氣認真厲害。


開工一腳踢

日前唐文龍去電台做訪問,冇請助手跟身,佢一個人拖住個開工篋截的士,趕住轉場到黃大仙出席《溏心3》宣傳活動。連跑兩場後,唐文龍又一個人拖篋搭的士返屋企,自己落手搬嘢上樓。



提到日前在街頭被老中青數十市民圍住集郵,唐文龍百般感觸:「係好誇張!以前真係未試過,坦白講自己係開心嘅!依家會好好把握,唔諗其他嘢住,專心做好工作先!」

下一頁:認恨攞視帝 王浩信唔怕醜四出拉票